«Roskongress» gaznasynyň çakylygy we Rossotrudniçestwonyň goldawy bilen «Ojar Aziýa» kompaniýasynyň wekili 3–6-njy iýunda Sankt-Peterburg şäherindäki «Ekspoforum» kongres-sergi merkezinde geçirilen XXIX Sankt-Peterburg halkara ykdysady forumyna (SPIEF-2026) gatnaşdy. Şu ýylky forum «Pragmatiki dialog — durnukly geljege barýan ýol» diýen şygar astynda geçirildi.

Işewürlik maksatnamasynyň çäklerinde kompaniýanyň wekili Russiýa Federasiýasynyň Prezidenti Wladimir Putiniň, Özbegistan Respublikasynyň Prezidenti Şawkat Mirziýoýewiň, Tanzaniýa Birleşen Respublikasynyň Prezidenti Samiýa Suluhu Hassanyň hem-de Hytaý Halk Respublikasynyň Başlygynyň orunbasary Han Çženiň gatnaşmagynda geçirilen umumy mejlise gatnaşdy.

Forumyň çäklerinde halkara işewür toparlarynyň we ugurdaş guramalaryň wekilleri bilen birnäçe duşuşyklar hem-de gepleşikler geçirildi. Hususan-da, Wildberries, Agalarov Development, Hongqi Auto kompaniýalarynyň ýolbaşçylary, şeýle hem Daşary ýurtlarda kärhanalary ösdürmek boýunça Hytaý assosiasiýasynyň (CODA) wekilleri bilen gepleşikler geçirilip, özara aragatnaşyklar ýola goýuldy. Mundan başga-da, Russiýanyň media jemgyýetçiliginiň wekilleri bilen duşuşyklar guraldy.

Şeýle hem işewür toparlarynyň wekilleriniň we «Roskongress» gaznasynyň hyzmatdaşlarynyň gatnaşmagynda geçirilen B2B duşuşyklaryna aýratyn üns berildi. Gepleşikleriň dowamynda gurluşyk pudagynda, maýa goýum işjeňliginde, infrastruktura taslamalaryny durmuşa geçirmekde we halkara işewür gatnaşyklary ösdürmekde hyzmatdaşlygyň geljekki ugurlary ara alnyp maslahatlaşyldy.

SPIEF ykdysadyýet, maýa goýumlar we işewür hyzmatdaşlygy ösdürmek meselelerini ara alyp maslahatlaşmak üçin öňdebaryjy halkara meýdançalarynyň biri bolup durýar. SPIEF-2026 forumyna gatnaşmak «Ojar Aziýa» kompaniýasyna halkara hyzmatdaşlyk gatnaşyklaryny giňeltmek, maýa goýumlar, gurluşyk we infrastruktura ösüşi ugurlaryndaky häzirki zaman meýillerini öwrenmek, şeýle hem türkmen işewürliginiň mümkinçiliklerini halkara derejede tanatmak üçin goşmaça mümkinçilikleri döretdi.

Çeşme: TMT News